mahi fathi
02-04-2016 - 02:45 pm


جيل الثمانينات والتسعينات
تحية لجيل البراءة والطفولة الحقيقية تحية لجيل الثمانينات والتسعينات وهذة هى الاسباب:

احنا آخر جيل إتعلم اللعب فى الشارع , وأول جيل بدأ يلعب أتاري وإتفرج على الكارتون بالألوان , وإتفسحنا في الجناين .

إحنا آخر جيل كان بيسجل الأغانى من الراديو والتلفزيون , وكنا بنسمعهم على الـWalkMan

إحنا إتعلمنا إزاى نبرمج الفيديو قبل أى حد , إحنا اللى لعبنا على الأتارى و سوبر ماريو

احنا جيل زينا وهرقليز و اول جزء من عائله ونيس وبوجى وطمطم وعمو فؤاد و مازنجرز وسلاحف النينجا وكابتن ماجد والبوررينجرز وعروستى

إحنا اللى شفنا الإنترنت على سرعة 56 ك/ب بفاكس مودم وكنا بنفتح صفحة واحدة بس

إحنا جيل شرايط الكاسيت الاصلى و التقليد وعمل الكوكتيل بشرايط تي دي كيه

إحنا اللى كنا بنسافر فى العربيات اللى من غير حزام آمان ولا كيس هوا ,

إحنا اللى عيشنا من غير محمول وكنا بردوا على إتصال ببعض

إحنا اللى كنا بنأجر العجل ونجرى بيها من غير فرامل وممكن نحط زجاجة زيت فاضية في العجلة اللي ورا علشان تعمل صوت

إحنا لا شفنا بلاى إستيشن ولا تليفزيون فيه أكتر من 100 قناة

إحنا لا شفنا شاشة مسطحة ولا 3D ولا صوت مجسم ولا Mp3 ولا Ipod

إحنا آخر جيل كان بيقضى وقت فراغه فى قراءة قصص طويلة , رجل المستحيل ونوسه لوزة تختخ عاطف محب وغيرها

احنا اللي كنا بنستني برنامج طلباتك ايه من الخميس للخميس عشان نتفرج علي الكليبات وتاكسي السهره ومواقف وطرائف وعالم البحار والعلم والايمان للدكتور مصطفي محمود واليوم المفتوح يوم الخميس و الشعراوى بعد صلاه الجمعه

احنا الجيل اللى كنا بنصحى يوم الجمعه نتفرج على برنامج سينما الاطفال لعفاف الهلاوى وبعدها نشرة اخبار الاطفال وبعدها نتفرج على سر الارض

إحنا اللي كنا بنلاقى الربع جنيه ف الكارتيه والشيبسى

إحنا الجيل اللي كان بيستني الفيلم الهندى كل عيد , مرتين في السنة , وهما هما نفس الأفلام

إحنا الجيل اللي كان بيلعب كورة حقيقى مش بلاى ستيشن
إحنا آخر جيل عرف طعم النوم في الطفولة بعيد عن الموبايل واللابتوب والدش و الـ MP3

إحنا الجيل اللى عاشر اول موبايل نزل

إحنا اللى كنا نستنى رمضان يجى بسرعة عشان نلم من العماره كلها فلوس ونجيب زينة رمضان ونعلقها مع بعض , ونتفرج على عمو فؤاد و نسمع الشعراوى قبل الفطار نستنى لمة العيلة و نفطر على بوجى و طمطم و بكار و بعد شوية نشوف فطوطة و نيللى و شريهان

إحنا اللى كنا بنستنى الفيلم الاجنبى كل خميس ع القناة التانية

إحنا اللى كنا عايشين من غير فيس بوك ولا تويتر ولا سكاى بى

إحنا اللي كنا بنحلم نشوف الدنيا عاملة إزاى بعد نص الليل لأننا عيشناه نايمين

إحنا الجيل اللي اتربى على حاجة اسمها نعم مش ايه

إحنا جيل البرائه والطفوله اللى بجد.. احنا جيل قضينا أحلى أيام عمرنا ويارتها دامت و فضلنا صغيرين



اراء