اسهل طريقة لتخليل الفسيخ بالصور

كل سنة وانتوا طيبين احنا على قدوم عيد شم النسيم اللى لا يمكن يخلى من الفسيخ وفى ناس بتحبه طول السنة ولكن لان فى ناس بتقلق من الفسيخ الجاهز والتسمم جيت ليكم بطريقة سهلة لتخليل الفسيخ فى البيت وهى:

الاول هنجيب البورى ونغسلة كويس وننشفة ونحطى فى شفشق راسة تحت والديل فوق عشان يصفى اى مياة فية تقريبا لمدة سعتين او تلاتة

وبعدين هنشيلة وننشفة كويس جظا وبمناديل ورق نخش فى الخياشيم ننشفها انا مش عايزة فية اى نقطة مياة

وبعدين نجهز طبق فية ملح وشطة السمكة الواحدة بتاخد 3 معالق ملح ونص معلقة شطة وتجهزى 3 ليمونات ونص كوباية زيت
هنبدا نشتغل

هنحشى خياشيم السمك بالملح والشطة ونفرك السمكة بالملح والشطة واعصر الليمون والزيت ونجيب اكياس ثلاجة الى هى وزن كيلو على قد السمكة

انا بحب الف كل سمكة فى كيس لوحدها وبلزق والف على السمكة كلها واضمن ان مفيهاش ذرة هوا وبعدين ارص كل اكياس السمك فوق بعض فى كيس كبير واقفل علية الكيس كويس قوى

امى اللة يرحمها كانت تقلى حطى تقل على السمك المملح عشان ينزل ميتة ويستوى وانا لسة بعمل كدة لما اقفل الكيس احطة فى علبة واحط فوقية اى حاجة تقيلة عندى قالب طوب احمر فى البلكونة جيباة للظروف دى بحطة على كيس السمك واسيبة

وكل 5 ايام بقلب اكياس السمك بشقلبها يعنى على الوش التانى ويادوب 15 يوم وافتحى وكلى

وممكن ترصى السمك كلة فوق بعضة وبين كل سمكة وسمكة رشة ملح وسطة وعصرة ليمون ولما تخلصى حطى على الوش الزيت

ميزة لف كل سمكة لوحدها انى مش مجبرة استخدم كل السمك لما افتح علية عشان هوا لا انا بفتح سمكة سمكة بمزاجى ومبخفشى يبوظ

وكمان حدقت حبة سردين عشان الاستخدام اليومى مقدرشى يكون عندى زفارة فى البيت ومكلهاش

جبت السردين كيلو سردين كل سمكه عليها معلقه ملح وربع كده

من الي بناكل بيها السردين هنا حبتو كبيره ونص معلقه شطه حمره

وبتغسيلي السردين وتشطفي خيشيمه كويس من الدم وتضغطي علي الحم بحيث يتفصل من الشوكه زي الصوره وترصيها في شفشق او كبايه كبيره عشان يتصفه حوالي سعتان

وبعدين بتجيبي كيس وتحطي ملح وشطه وترصي السمك وعليه رشه ملح وشطه وباقي السمك وباقي الملح والشطه وتعصري لمونتان عليه

وتقفلي الكيس كويس وطلعي الهوا منه ولفيه في كزا كيس وحطيه بعلبه وفوق دولاب المطبخ وكل يوم اقلبي الكيس علي لاتجاه التاني ومن 6 الي 10 ايام يكون ممتاز

ملحوظة ::::
انا من الناس الى بقرف من قلب الفسيخ وفى مرة خدت قرار انى افتح قلب البورى وانضفة واحدقة وكانت تجربة ياصابت ياخابت وبصراحة صابت كلت شوية فسيخ زبدة عملت اية بقا فتحت البطن ونضفتها ونسفتها كويي قووووى وقفلتها زكملت كل خطواتى زى البورى العادى وطلع زبدة يامعلم لو مش مصدقانى جربى فى وحدة وشوفى مش هتخسرى حاجة

وبالف هنا