mahi fathi
09-11-2016 - 07:48 pm


علامات فتور الزوجة من الزوج
ان الحياة الزوجية هى عبارة عن شركة بين اثنين فأذا تقاربا وتفاهما صارا متفاهمين وتنجح الشركة وينجح الزواج ولكن هناك شركات تخسر وذلك بسبب اهمال احد طرف العلاقة او الشركة وقد اتينا اليكم بعلامات فتور الزوجة من الزوج المهمل:

لما مراتك تبقى بطلت تتناقش معاك وتحاورك ..ده مش تسليم للأمر الواقع لكن هى إتأكدت إنك مش هتسمعها..

لما مراتك تكون بطلت تكلمك عن يومها وعن اهلها..مش معناها لاجديد ..لكن ده تأكيد إنك مابتعملش حاجة غير تنقدها وبس..

لما مراتك اللى كانت زمان بتعيط لما تجرحها ودلوقتى إنت بنفس إسلوبك لكن هى بطلت حتى تدمع..ده مش نضج..لكن هى فقدت فيك الأمل بتقديرها...

لما مراتك تبقى بطلت تكلمك إلا للضرورة ده مش إنشغال لكن حست إنها عبء عليك بكلامها فملوش داعى الإزعاج...

لما مراتك سيادتك تستفزها بالكلام عن غيرها وتقارنها فى الرايحة والجاية وهى ولا أى إندهاش ..ده مش لامبالاه لكن هروب من كسرتها اللى إنت مصمم عليه...

لما مراتك اللى كانت بتترجى فيك تقعد معاها شوية زمان بقت تاخد الولاد وتدخل تنيمهم وتسييييبك على راحتك ده مش بتريح سعادتك ..لكن الإهتمام مش محتاج شحاتة....

لما مراتك تبطل تسألك عن يومك مش إهمال لكن هى زمان كنت بتفتكرها زنانة لو.قالتلك عملت إيه بس...

لما مراتك بطلت تتكلم عن تفاصيل ملهاش لازمة بس كانت بتقولها بإندماج ..ده مش خير الكلام ماقل ودل إنت مش مدير شركة ومطالب تسمع جنونها..إنت المفروض الطبطبة اللى بتسمع لها افكارها ..ده معناه إنها مش لاقية نفسها معاك...

فى فرق كبييييير اوى بين واحدة كانت فى الاول كده وواحدة بطلت تعمل كده الاولى دى تركبيتها كيان والتانية إحساسها مهان...
ركز فى التفاصيل وإرخى الحبل ..الانثى لو قلبها كبر عليها بيبان..
مراتك مش عبء مراتك سكن حافظ عليه ،

فى النهاية نتمنى ان تكونوا قد استفدتم معنا فتابعونا حتى يصلكم كل جديد ومفيد وصحى.



الحياة الزوجية